Anfang Februar organisierte der Elternverein den 2. Skitag. 27 Mitglieder holten ihre Skis aus dem Keller:

De Eltereverein Henggart het sin Schiitag,
gueti Luune das isch kei Frag.
Uf de fahrt noch Wildhuus,
hemmer au mitgno diä chlinscht Muus.

Mit isch Helm und Schii,
schneiä tuets ganz fii
D Eltere gnüsset zwüschetdure en Kafi Schnaps,
freud im Schnee het au de chlinscht Fratz.

S Wetter isch unverhofft gar nöd so schlecht,
das isch üs allne würkli recht.
Gege Obig müed sind üsi Bei,
heigoh alli zämä? Nei,nei,nei!

Fahre düemer i`d Wasserflueh,
Mit so viel Chind do giz no lang kei Rueh.
Döt obe innere herzige Besebeiz,
mit würkli ganz bsunderem Reiz.

Mer esset feins Fondü us de Pfanne,
Aber kei Tee us den Channe,
sondern Wii us de Fläsche,
mitgnoh hemmer au d Molitäsche.

Z` friede sind am zeichne d Chind,
verusse got en chalte Wind.
Es isch spot und mer gönd Hei,
zum Glück hemmer morn no alli frei.

Nögscht Johr machet mer so en Schiitag???
Jo, jo das isch kei Frag!
Chömmet Ihr den au?

Mer ganz sicher, das weiss ich ganz genau.

Von Claudia Filter